USD
«Қайрат» клубының бас бапкері Рафаэль Уразбахтин Чемпиондар лигасының топтық кезеңінде Испанияның «Реалына» қарсы алдағы ойында қақпашы рөліне кім шығатынын айтты.
Бас бапкердің айтуынша, жағынан оңбай жарақат алған Темірлан Анарбеков ауруханадан шыққан, команда базасына келіп те үлгерген, жағдайы жақсарып келеді.
«Әзірге оған фиксация қойылған, бірақ алдағы күндері алынып, жаттығуға кірісе алады. Ең бастысы – титан пластиналар сіңісіп кетуі керек. Жалпы, дәрігерлердің айтуынша, реабилитация қалыпты жүріп жатыр», – деді Уразбахтин.
Сонымен қатар бапкер командада басқа да нұсқалар барын атап өтті:
- Александр Заруцкий – бірнеше күннен кейін жаттығуға қосылып, көп ұзамай алаңға шыға алады;
- Шерхан Қалмұрза – қазір негізгі қақпашы;
- Жас ойыншылар – команда қарамағында.
«Менің ойымша, бір-екі апта ішінде қақпашыларымыздың бәрі қатарға қосылады», – деді бапкер.
Айта кетейік, осыған дейін негізгі қақпашы Александр Заруцкий мен оны алмастыратын Темірлан Анарбеков жарақат алып қалған. Осыған байланысты екеуі де «Реалға» қарсы кездесуде алаңға шыға алмайды.
