Алматыда жол қозғалысы ережесін өрескел бұзып, жаяу жүргіншілерге қауіп төндірген жүргізуші әкімшілік жазаға тартылды. Сот шешімімен оған 20 тәулікке әкімшілік қамақ тағайындалды.
Оқиға жүргізушінің өзі әлеуметтік желіге жүктеген бейнежазба арқылы анықталған. Кадрларда көліктің жол қиылысында келе жатып, кенеттен көлденең бағытта сырғанап, дрифт жасағаны байқалады.
Жүргізуші қауіпті маневр жасап, көлікті жоғары жылдамдықпен әрі агрессивті түрде басқарған. Сол уақытта жолдың арғы бетіне жаяу жүргіншілер бағдаршамның рұқсат етілген белгісі жанған кезде өтіп бара жатқан.
Бұдан бөлек, бейнежазбада балағат сөздер қолданылған. Кейін жүргізуші бұл видеоны өзі әлеуметтік желідегі парақшасына жариялаған.
Полиция қызметкерлері бейнежазбадағы азаматтың жеке басын анықтап, оны жауапкершілікке тартты. Құқық қорғау органдарының мәліметінше, жүргізуші жол қозғалысы талаптарын бұзумен қатар, ұсақ бұзақылық жасаған.
Сот оның кінәсін анықтап, 20 тәулікке әкімшілік қамауға алу туралы шешім шығарды.
Полиция қауіпті жүргізу тәсілдерін көпшілікке көрсету мақсатында жолда дрифт жасауға жол берілмейтінін атап өтті. Сондай-ақ мұндай әрекеттерді әлеуметтік желіге жариялау жауапкершіліктен құтқармайтынын ескертті.
Құқық қорғау органдары жүргізушілерді жолдағы қауіпсіздік талаптарын сақтап, өзге жол қозғалысына қатысушылардың өмірі мен денсаулығына қауіп төндіретін әрекеттерден бас тартуға шақырды.
