USD
Қырғызстанда өтіп жатқан VI Дүниежүзілік көшпенділер ойындарында көкпардан Қазақстан құрамасы финалға жолдама алды.
Қазақстандық көкпаршылар топтық кезеңдегі соңғы ойынында Венгрия командасын 9:4 есебімен жеңді. Осы нәтижеден кейін ұлттық құрама өз тобында бірінші орынға шықты. Қазақстандық спортшылар алдын ала кезеңдегі екі кездесуінің екеуінде де жеңіске жетіп, құрамында Ресей командасы бар В тобында үздік атанды.
Енді Қазақстан құрамасы алтын медаль үшін А тобында көш бастаған Қырғызстан командасымен кездеседі. Турнирдің шешуші ойыны 6 қыркүйекте Астана уақытымен 13:00-де өтеді.
Қазақстан мен Қырғызстан көшпенділер ойындарының көкпар финалында үшінші рет қатарынан жолығалы отыр. Бұған дейінгі екі шешуші кездесуде де Қазақстан құрамасы жеңіске жеткен. Алғашқы финалда есеп 4:3 болса, кейінгі ойында қазақстандықтар 5:4 есебімен басым түскен.
VI Дүниежүзілік көшпенділер ойындары Қырғызстанда өтіп жатыр. Халықаралық дода 6 қыркүйекте өз мәресіне жетеді.
