USD
Қазақстанда азаматтарды алдаудың жаңа тәсілі пайда болған. Соңғы уақытта интернет кеңістігінде өзін емші, балгер немесе көріпкел ретінде таныстыратын адамдар тұрғындарға хабарласып, «балаңызға қатты дуа жасалған» деп сендіруге тырысуда.
Алаяқтар осы арқылы ата-аналардың баласына деген алаңдаушылығын пайдаланады. Олар түрлі «белгілерді» алға тартып, жағдайдың күрделі екенін айтып, кейін мәселені шешу үшін ақылы «ем» ұсынады.
Әдетте мұндай адамдар әлеуметтік желілер мен мессенджерлер арқылы байланысқа шығады. Жәбірленушіні сендіргеннен кейін «дуаны қайтару», «ем жүргізу» немесе арнайы заттар сатып алу қажет екенін айтып, ақша аударуды талап етеді.
Құқық қорғау органдары мұндай хабарламаларға сақтықпен қарауға шақырады. Интернетте бейтаныс адамның ауруды емдеуге немесе көз тию мен дуадан арылтуға қатысты уәдесіне бірден сенуге болмайды.
Полиция азаматтарға мынадай қауіпсіздік шараларын сақтауды ұсынады:
- бейтаныс адамдардың есепшоттарына ақша аудармау;
- банк картасының нөмірі, құпия деректері мен SMS арқылы келген кодтарды ешкімге бермеу;
- күмәнді ақпаратты бірнеше дереккөз арқылы тексеру;
- қорқынышқа бой алдырмай, асығыс шешім қабылдамау;
- алаяқтық белгілері байқалса, хат алмасуларды, телефон нөмірлерін және төлем түбіртектерін сақтап қою.
ІІМ өкілдерінің айтуынша, алаяқтардың негізгі әдісі — адамның сеніміне кіріп, оның қорқынышы мен уайымын өз пайдасына пайдалану.
Егер осындай схемаға тап болсаңыз немесе ақша аударып қойған болсаңыз, полицияға дереу 102 нөмірі арқылы хабарласу қажет.
