USD
Оралда ер адам танысын бірнеше жерінен пышақтап, өлімге әкелген ауыр жарақат салған. Сот барысында айыпталушы бұл әрекетін өзін қорғау үшін жасағанын айтып, ақталуға тырысқан. Алайда кассациялық сот оның бұл уәжін негізсіз деп таныды.
«Кассациялық соттар» мәліметінше, бірінші инстанциядағы сот ер адамды кінәлі деп танып, бес жылға бас бостандығынан айыру жазасын тағайындаған. Кейін апелляциялық сот алғашқы үкімді өзгеріссіз қалдырған.
Бұған келіспеген сотталған азамат кассациялық шағым түсіріп, іс бойынша ақтау үкімін шығаруды сұраған. Оның айтуынша, жанжалды марқұм бастаған және алғаш болып пышақпен шабуыл жасаған. Айыпталушы қарсы тараптың қолындағы қаруды тартып алып, содан кейін өзін қорғау мақсатында бірнеше рет пышақ қолдануға мәжбүр болғанын мәлімдеген.
Алайда кассациялық алқа оның айтқандарын растайтын жеткілікті дәлел болмағанын анықтады.
Сот материалдарына сәйкес, оқиға кезінде ер адам мас болған. Ол танысына кемінде он рет қасақана пышақ жарақатын салған. Жәбірленуші алған жарақаттардың салдарынан көп қан жоғалтып, көз жұмған.
Сонымен қатар сот жәбірленушінің оқиға кезінде белсенді қарсылық көрсетпегенін ескерген. Оның денесіндегі жарақаттардың сипаты мен оқиға орнындағы жағдай шабуылды сотталған азаматтың өзі бастағанын көрсеткен.
Кассациялық сотта іс бойынша сараптама қорытындылары, куәгерлердің жауабы және оқиға орнынан алынған заттай дәлелдер зерттелген. Оқиға орнынан пышақ пен қан іздері табылғаны да іс материалдарында көрсетілген.
Осы деректерді ескере отырып, кассациялық сот ер адамның әрекетін ҚР Қылмыстық кодексінің 106-бабы 1-бөлігі бойынша саралауды заңды деп таныды. Бұған қоса, бес жылдық бас бостандығынан айыру жазасы да негізді деп бағаланды.
Сот істі қарау барысында заң талаптарының бұзылмағанын атап өтіп, төменгі соттардың шешімдерін күшінде қалдырды.
