USD
Теміртау қаласында есірткі өндіріп, оны заңсыз таратқан ұйымдасқан қылмыстық топтың мүшесі Ресейден Қазақстанға жеткізілді. Күдікті қылмыстық қудалаудан бой тасалап, шетелге қашып кеткен.
Бас прокуратураның мәліметінше, күдікті Ресей аумағында ұсталып, Қазақстан тарапының сұрауы бойынша елге экстрадицияланған. Қазір ол уақытша ұстау изоляторына қамалды.
Тергеу деректеріне сәйкес, топ мүшелері дайындаған психотроптық заттарды Қарағанды облысының аумағында өткізген. Қылмыстық қызметтен түскен қаражатты заңдастыру үшін әртүрлі қаржылық операциялар жүргізілген.
Атап айтқанда, күдіктілер криптоайырбастау сервистері арқылы 1,8 млрд теңгеден астам қаражатты өткізген. Сонымен қатар 600 млн теңгеден астам ақша жылжымайтын мүлік, коммерциялық нысандар мен автокөлік сатып алуға жұмсалған.
Құқық қорғау органдары заңсыз жолмен алынған активтерге тыйым салып, оларды тәркіледі. Бұдан бөлек, қылмыстық топ мүшелерінен шамамен 10 келі мефедрон тәркіленген.
Бас прокуратураның хабарлауынша, топтың кейбір мүшелеріне қатысты қылмыстық іс қазір сотта қаралып жатыр. Ал басқа күдіктілердің бір бөлігі әлі де іздеуде. Олардың қатарында шетелде жасырынған адамдар да бар.
Осы іс бойынша Ресейден экстрадицияланған күдікті қазір қамауда отыр. Оған тағылған айыптар сотта дәлелденген жағдайда, мүлкін тәркілеумен қатар 20 жылға дейін бас бостандығынан айыру жазасы қарастырылған.
Бұған дейін аталған қылмыстық топтың тағы бір белсенді мүшесі Грузиядан Қазақстанға экстрадицияланған болатын.
