Астанада мас ер адам бөтен пәтерге кіріп, үш баланың жанында ұйықтап қалған

Астанада тұрғындардың бірі әлеуметтік желіде бөтен адамның пәтерге кіріп, үш кішкентай баланың жанында ұйықтап қалғанын айтып, оқиға туралы жазба жариялады. Оқиға 12 қыркүйекте болған.

Жазба авторының мәліметінше, сол күні балалардың анасы шамамен сағат 10:35-те жұмысқа кеткен. Үйде 6, 4 және 2 жастағы үш бала қалған. Кейін олардың әкесі әйеліне хабарласып, жұмыстан үйге қайтып келе жатқанын айтқан.

Шамамен сағат 11:00-де ер адам үйіне келгенде, пәтер есігінің тұтқасы сынғанын байқаған. Сонымен қатар кіреберістен өзіне тиесілі емес аяқ киімді көрген. Үйдің ішіне кірген кезде үш баласының жанында бейтаныс ер адамның ұйықтап жатқанын анықтаған.

Әлеуметтік желідегі ақпаратқа сәйкес, балалардың әкесі алдымен бейтаныс адамды тыныш оятып, пәтерден шығарып жібермек болған. Алайда ер адам оған қарсылық көрсетіп, жұдырық ала жүгіріп, соққы жасаған.

Оқиға балалардың көз алдында болған. Қорыққан балалар жылап, көмекке шақырған. Олардың дауысын естіген көршілер пәтерге келіп, балаларды қауіпсіздік мақсатында өз үйлеріне кіргізген. Кейін полиция шақырылып, балалардың анасына болған жағдай туралы хабар берілген.

Оқиғаның мән-жайы мен бөтен адамның пәтерге қалай кіргені туралы ақпарат әлеуметтік желідегі жазбада баяндалған.