Қырғыз билігі де қоғамдық орында қауға сақал, ниқабпен жүруге тыйым салмақ

Қырғыз депутаты Шарапатқан Мәжитова елде бетін жауып тұратын киім киюге және көлемді сақал қоюға тыйым салуды ұсынды. Құқықбұзушылық кодексіне тиісті түзетулер қоғамдық талқылауға шығарылды.

Заң жобасы қауіпсіздікті қамтамасыз ету қажеттілігі мен жеке басын сәйкестендіру және азаматтардың құқығы мен бостандығын сақтау арасындағы теңгерімді ұстануға бағытталған. Ол мемлекеттік органдардың қоғамдық орындарда жеке басын сәйкестендіруді шектейтін паранжа және көлемді сақал қоюдың алдын алу және жолын кесу үшін әзірленген. Ал шетелдіктер мен дипломаттарға тыйым салынбайды.

Ұсыныс жеке басын сәйкестендіру мүмкіндігін қамтамасыз ету мақсатында азаматтардың қоғамдық орындарда киімі мен сыртқы түрін реттеуге бағытталған заңнамалық өзгерістерге қатысты. Айта кету керек, мұндай заңдар адам құқығының негізгі қағидаттарын, соның ішінде жеке өмірге қол сұғылмаушылық пен жеке бас бостандығын құрметтеуге тиіс, - делінген құжатта.

Қолданыстағы «Қырғыз Республикасының азаматтарын биометриялық тіркеу туралы» Заңға сәйкес, мыналарды жинау, өңдеу, сақтау және пайдалану қажет екендігі атап өтіледі:

• беттің цифрлық графикалық бейнесі;
• екі қол саусақтарының папиллярлық үлгілерінің графикалық құрылымы;
• жеке басын анықтайтын қолы.

Бұл биометриялық параметрлер азаматтарды анықтауға және әртүрлі мемлекеттік және қоғамдық функцияларды орындау кезінде қауіпсіздікті қамтамасыз етуге мүмкіндік береді.

Заң жобасында азаматтарды діни сеніміне қарай кемсітпейтіні баса айтылған.

«Ол азаматтардың қоғамдық орындардан тыс жерде діні мен наным-сенімдерін еркін білдіру құқығын шектемейді және ұлттық немесе әртүрлі бас киімдерді киюге тыйым салмайды», - делінген құжатта.