Алдағы күндері 46 градус ыстық күтіледі

«Қазгидромет» РМК мамандары алдағы күндерге арналған ауа райы болжамын ұсынды.

Синоптиктер Қазақстанның басым бөлігінде солтүстік-батыс циклонының өтуіне байланысты ауа райы тұрақсыз сипат алады деп болжады. Ел аумағында жаңбыр жауып, найзағай ойнап, екпінді жел тұрады. Әсіресе, 18-19 маусым күндері солтүстік-батыс және солтүстік өңірлерде қатты жаңбыр жауады, кей жерлерде бұршақ түсуі ықтимал. Ауа температурасы да айтарлықтай құбылып, кей аймақтарда төмендейді. Мысалы, солтүстік-батыс пен солтүстікте түнгі температура 17-25 градустан 15-23 градусқа дейін, ал күндізгісі 25-35 градустан 20-31 градусқа дейін төмендеуі мүмкін. Орталық өңірлерде түнгі ауа температурасы 18-25 градустан 15-22 градусқа дейін төмендеп, 17-18 маусымда күндіз 35-39 градусқа дейін, ал облыстың оңтүстігінде 42 градусқа дейін қатты ыстық байқалады. Алайда, 19 маусымда температура 27-32 градусқа дейін төмендейді.

Шығыс Қазақстанда түнгі температура 12-23 градустан 17-25 градусқа дейін жоғарылап, күндіз 27-35 градустан 35-39 градусқа дейін көтеріледі, кейбір аудандарда 40 градус өте қатты ыстық күтіледі. Оңтүстік-шығыс өңірде де түнгі температура 18-23 градустан 20-25 градусқа дейін жоғарылап, күндіз 35-39 градусқа дейін қатты ыстық болады. 18-19 маусым аралығында кейбір жерлерде 42 градусқа дейін көтеріледі. Ал оңтүстік аймақтарда күндіз 43-46 градусқа дейін жеткен аптап ыстық біртіндеп 30-38 градусқа дейін төмендейді деп болжануда.