Алматыда көлік жүргізу құқығынан айырылған 414 адам қайтадан рөлге отырған
Алматыда сот шешімімен көлік басқару құқығынан айырылғанына қарамастан, жолға қайта шыққан 414 жүргізуші анықталды. Бұл туралы қалалық Полиция департаментінің баспасөз қызметі хабарлады.
Ведомствоның мәліметінше, аталған деректер жыл басынан бері тіркелген. Бұған дейін бұл азаматтар жол қозғалысы ережелерін бұзғаны үшін сот шешімімен жүргізуші куәлігінен айырылған.
Олардың қатарында мас күйінде немесе есірткі заттарын қолданғаннан кейін көлік басқарған, сондай-ақ қарсы қозғалыс жолағына шыққан жүргізушілер бар. Соған қарамастан, олар қайтадан көлік тізгініне отырған. Енді заң талаптарын елемеген азаматтар жауапкершілікке тартылады.
Полиция өкілдері мұндай әрекеттер жол қозғалысына қатысушылардың өмірі мен денсаулығына үлкен қауіп төндіретінін ескертті. Соттың көлік жүргізуге салған тыйымын бұзғандар заң аясында жауап береді.
Сонымен қатар бұған дейін Алматыда жолда қауіпті маневрлер жасаған екі жүргізуші анықталған болатын. Әкімшілік полиция қызметкерлері олардың жеке басын анықтап, екеуінің де 20 және 23 жастағы қала тұрғындары екенін хабарлады.
Тексеру нәтижесінде жүргізушілердің қауіпсіздік белдігін тағу талабын бұзғаны және жолда қауіпті әрекеттерге барғаны расталды. Оларға қатысты әкімшілік хаттамалар толтырылды.
Полиция тұрғындарды жол ережелерін сақтауға және өзге жол қозғалысына қатысушылардың қауіпсіздігіне жауапкершілікпен қарауға шақырды.
«Рөлдегі жауапсыздық бір сәтте қайғылы жағдайға ұласуы мүмкін. Жол – жарыс алаңы емес. Жол қозғалысы ережелерін сақтап, өзіңіз бен өзгелердің өміріне қауіп төндірмеңіз», – деп ескертті ведомство өкілдері.
USD