Тоқаев Оңтүстік Қазақстан университетіне ұлттық мәртебе берді
Қазақстан Президенті Қасым-Жомарт Тоқаев Мұхтар Әуезов атындағы Оңтүстік Қазақстан университетіне ұлттық мәртебе беру туралы шешім қабылдады. Бұл туралы Мемлекет басшысы бүгінгі форумда мәлімдеді.
Президент Шымкент қаласын еліміздің оңтүстігіндегі ірі ғылыми және білім беру орталығына айналдыру қажеттігін атап өтті. Оның айтуынша, қазіргі уақытта Астана мен Алматы Қазақстанның зияткерлік, ғылыми және мәдени орталықтары ретінде қалыптасқан. Бұған осы қалаларда жетекші ұлттық жоғары оқу орындарының орналасуы да ықпал етіп отыр.
Енді Шымкенттің де осы бағыттағы әлеуетін арттыру көзделіп отыр. Қалада халықаралық білім беру жобалары жүзеге асуда. Атап айтқанда, Arizona State University білім беру бағдарламасы енгізіліп, Түркияның Гази университетінің филиалы ашылған.
Мемлекет басшысы оңтүстік өңірдегі жоғары білім мен ғылымды дамыту жұмыстарын жаңа деңгейге көтеру керектігін айтты.
«Мен халқымыздың заңғар жазушысы Мұхтар Әуезов атындағы Оңтүстік Қазақстан университетіне ұлттық мәртебе беру туралы шешім қабылдадым», – деді Қасым-Жомарт Тоқаев.
Президенттің сөзінше, Әуезов университеті – өңірдегі ең ірі жоғары оқу орындарының бірі. Қазіргі таңда Шымкенттегі әрбір бесінші студент осы білім ордасында білім алады.
Сонымен қатар Мемлекет басшысы ұлттық мәртебе университетке ғана емес, оған жауапты министрлікке де үлкен міндет жүктейтінін атап өтті.
Тоқаев оқу орны сапалы білім беретін, ғылыми зерттеулер жүргізетін және бүкіл оңтүстік өңірдің зияткерлік дамуына үлес қосатын орталыққа айналуы тиіс екенін жеткізді.
USD