Қазақстан мен АҚШ арасында тікелей әуе рейсі 2027 жылдың соңында іске қосылуы мүмкін
Қазақстан мен Америка Құрама Штаттары арасында тікелей әуе қатынасын ашу мәселесі талқыланып жатыр. Алдын ала жоспарға сәйкес, екі ел арасындағы алғашқы рейс 2027 жылдың соңына дейін орындалуы мүмкін. Бұл туралы ҚР Азаматтық авиация комитетінің баспасөз қызметі мәлімдеді.
Azattyq Rýhy хабарлағандай, бұл мәселе Көлік вице-министрі Талғат Ластаевтың АҚШ Көлік министрінің авиация және халықаралық қатынастар жөніндегі ассистенті Дэниел Дж. Эдвардспен кездесуінде көтерілген.
Келіссөздер Монреаль қаласында өткен Халықаралық азаматтық авиация ұйымының (ИКАО) әуе көлігі жөніндегі 7-ші Дүниежүзілік конференциясы аясында ұйымдастырылды.
Қазіргі уақытта Қазақстан АҚШ Федералдық авиациялық басқармасының (FAA) қауіпсіздік стандарттары бойынша 1-санатты алу бағытында жұмыс жүргізіп жатыр. Осы мақсатта америкалық тарап қыркүйек айында аудит өткізіп, оның алдын ала нәтижесі оң болған.
Азаматтық авиация комитетінің мәліметінше, кездесу барысында 2027 жылдың соңына дейін Қазақстан мен АҚШ арасында тікелей әуе рейсін іске қосу жоспары қарастырылған.
Талғат Ластаев Қазақстан тарапы екі мемлекет арасында тікелей әуе қатынасын орнатуға мүдделі екенін атап өтті.
Жаңа бағыттың ашылуы екі ел арасындағы көлік байланысын нығайтып, жолаушыларға АҚШ-қа транзитсіз ұшу мүмкіндігін беруі мүмкін. Дегенмен рейстің нақты іске қосылатын күні мен бағыты әзірге жарияланған жоқ.
USD