Петропавлда ащы кеспе мен энергетик ішкен ер адам ауыр халде ауруханаға түсті
Солтүстік Қазақстан облысының орталығы Петропавлда дәрігерлер ауыр жағдайда жеткізілген науқастың өмірін сақтап қалды. Ер адам жансақтау бөлімінде 12 күн ем қабылдап, ауруханаға түскеннен кейін 20 күн өткен соң үйіне шығарылған.
Аурухана мамандары бұл жағдайды жедел панкреатиттің қаншалықты қауіпті болуы мүмкін екенін көрсететін мысал ретінде келтірді.
Медициналық мекеменің мәліметінше, науқастың бұған дейін де панкреатиттің асқынуы болған. Алайда бұл жолғы жағдай бұрынғыдан әлдеқайда ауыр өткен.
Ер адамның айтуынша, денсаулығы нашарлар алдында ол белгіленген диетаны сақтамай, кола мен энергетикалық сусын ішкен. Сондай-ақ ащы кеспе жеген. Түнде іші қатты ауырып, бастапқыда таң атқанша шыдауға тырысқан. Бірақ ауырсыну күшейген соң жедел жәрдем шақыруға мәжбүр болған.
Ауруханаға жеткізілгеннен кейін науқастың жағдайы күрт нашарлап, дәрігерлер шұғыл түрде операция жасау туралы шешім қабылдаған. Операциядан кейін ол өздігінен тыныс ала алмай, жасанды тыныс алу аппаратына қосылған.
Науқас жансақтау бөлімінде 12 күн бойы дәрігерлердің бақылауында болды. Кейін жағдайы тұрақталып, емдеу шаралары жалғастырылды. Жалпы 20 күндік емнен кейін ер адам ауруханадан шықты.
Сондай-ақ ол өз өмірін сақтап қалған медицина қызметкерлеріне алғысын білдірді.
Дәрігерлер бұл оқиға арқылы панкреатитпен ауыратын адамдарға тамақтану тәртібін сақтап, емдеуші мамандардың ұсынымдарын орындаудың маңызын тағы да еске салды.
USD