Бас мүфти Астананың асабаларымен кездесіп, тойдағы ысырап пен әдепсіз ойындарды сынға алды
Қазақстан мұсылмандары діни басқармасының төрағасы, Бас мүфти Наурызбай қажы Тағанұлы Астанада асабалармен арнайы кездесу өткізіп, қазақ тойларындағы өзекті мәселелерді талқылады. Жиында артық шығын, ысырапшылдық және әдепке сай келмейтін ойындар сөз болды. Бұл туралы Azattyq Rýhy Мүфтияттың баспасөз қызметіне сілтеме жасап хабарлады.
Кездесуге Бас мүфти мен қала асабаларынан бөлек, мемлекет және қоғам қайраткері, Қазақстан Халық Кеңесінің мүшесі Нұртөре Жүсіп, белгілі журналист әрі диктор Зейін Әліпбек және діни басқарма өкілдері қатысты.
Басқосу барысында қазіргі тойларда жиі кездесетін мәселелер көтерілді. Атап айтқанда, қонақтар арасындағы орынсыз бәсеке, шамадан тыс шығын, дастарқанға тағамды мөлшерден тыс қою және бейәдеп ойындардың көбеюі талқыланды.
Наурызбай қажы Тағанұлы қазақ халқының ежелден той-думанды жақсы көретінін атап өтті. Алайда оның айтуынша, соңғы уақытта кейбір тойлар қуаныш пен берекенің орнына бәсекеге және орынсыз мақтанға айналып барады.
Бас мүфти тойдың негізгі мақсаты сән-салтанат көрсету емес, қуанышты жақындармен бөлісу, ағайынның басын қосу және ұлттық құндылықтарды дәріптеу екенін жеткізді.
Кездесуде асабалардың қоғамдық ортадағы рөліне де назар аударылды. Себебі той жүргізушілері мерекелік шараның мазмұны мен қонақтардың көңіл күйіне тікелей ықпал етеді.
USD