Тоқаев шетелдік университеттермен ынтымақтастықты жаңа деңгейге көтеруге шақырды
Қазақстан Президенті Қасым-Жомарт Тоқаев халықаралық ұйымдар мен жетекші шетелдік жоғары оқу орындарының басшыларымен өткен дөңгелек үстелге қатысты. Кездесу барысында білім беру, ғылым, технология және халықаралық академиялық әріптестікті дамыту мәселелері талқыланды.
Ақорда мәліметінше, Мемлекет басшысы мұндай кездесулер Қазақстан мен шетелдік білім ордалары арасындағы байланысты нығайтып, ынтымақтастықты жаңа сапалық деңгейге шығаруға мүмкіндік беретінін айтты.
Президент қазіргі геосаяси жағдайдың ғылыми және технологиялық салаларға да ықпал етіп жатқанын атап өтті. Оның сөзінше, халықаралық ғылыми байланыстарға деген көзқарас өзгеріп, технологиялық жетістіктер мемлекеттер арасындағы бәсекелестіктің маңызды құралына айналып келеді.
Сонымен қатар жасанды интеллект, жаңа материалдар, энергетика және биотехнология салаларындағы жетістіктер экономиканы ғана емес, еңбек нарығы мен білім беру жүйесін де түбегейлі өзгертіп жатыр.
Қасым-Жомарт Тоқаев жаңа технологияларды меңгеріп, білікті кадрлар даярлайтын және ғылыми жаңалықтарды нақты өндіріске енгізе алатын мемлекеттер ғана жаһандық бәсекеде табысқа жететінін жеткізді.
Мемлекет басшысы адам капиталын дамыту, ғылым мен инновацияны қолдау Қазақстанның стратегиялық басымдықтары екенін атап өтті. Бұл бағыттар алғаш рет Конституцияда мемлекеттің негізгі мақсаттары ретінде бекітілгенін де еске салды.
Президент биылғы Жолдауында технологиялық жаңғыруды жеделдету, ғылым мен өндіріс арасындағы байланысты күшейту және азаматтарды цифрлық экономика талаптарына бейімдеу міндеттеріне ерекше назар аударғанын айтты.
Оның пікірінше, бұл мақсаттарды жүзеге асыру үшін мемлекет, жоғары оқу орындары және бизнес өкілдері бірлесіп жұмыс істеуі қажет.
Сондай-ақ Тоқаев Қазақстанның әлемдегі жетекші университеттермен және ғылыми-зерттеу орталықтарымен серіктестік орнатуға дайын екенін мәлімдеді.
Президенттің айтуынша, шетелдік жоғары оқу орындарының филиалдарын ашуға қажетті бастапқы жұмыстар жүргізіліп, инфрақұрылым жасақталған және тиісті келісімдер рәсімделген. Ендігі міндет – осы әріптестікті нақты ғылыми жобалармен толықтыру.
Атап айтқанда, бірлескен зерттеулер жүргізу, жаңа технологиялар әзірлеу және оларды Қазақстан экономикасына енгізу жұмыстары күшейтілуі тиіс.
Осылайша, Мемлекет басшысы шетелдік университеттермен ынтымақтастықтың келесі кезеңінде басты назарды филиалдар ашуға емес, ғылым мен өндірістің нақты нәтижелеріне аудару қажеттігін атап өтті.
USD