Ақмолада терапевт науқасқа тегін берілетін ем-домды 1,5 млн теңгеге «сатып» жіберген

Ақмола облысында терапевт науқастан 1 жарым млн теңге алып, сотталып кетті.

Соттың хабарламасына сәйкес, көп бейінді ауданаралық аурухананың терапевтік бөлімше меңгерушісінің міндетін атқарушы дәрігер науқастың 1 жарым млн теңгесін алдап алған.

Шілде айында пациент қант диабеті және жүректің жіті коронарлық синдромы диагнозымен дәрігердің алдына келген. Терапевт оған тегін ем жасалатынын біле тұра, Астана қаласындағы № 2 қалалық ауруханадан «ақылы» ем алуды ұсынған. Осылайша өзінің есепшотына 1 500 000 теңге аударуды талап еткен. Науқаспен бірге келген жақыны дәрігердің шотына сұраған ақшаны жіберген.

Сот үкімімен терапевт 3 жыл мерзімге медициналық қызметпен айналысу құқығынан айырылып, 2 жылға сотталды.

Үкім заңды күшіне енген жоқ.