Ақтауда өткен түнде жер сілкінісі болды

Ақтау тұрғындары 27 тамызға қараған түні жерасты дүмпулерін сезді.

Куәгерлердің айтуынша, түнгі сағат бірге таяу үйлерде шамдар мен жиһаздар қозғала бастаған.

«Басында басым айналып тұр деп ойладым, кейін шамның теңселіп тұрғанын байқадым», – дейді қала тұрғыны.

Маңғыстау облысының Төтенше жағдайлар департаменті оқиғаның болғанын растады. Ведомство мәліметінше, жер сілкінісі жергілікті уақытпен 01:33-те тіркелген.

«Эпицентрі Каспий теңізінің акваториясында, Ақтаудан шамамен 271 шақырым жерде орналасқан. Магнитудасы – 5,2, тереңдігі – 15 шақырым (координаттары: 42°925 солтүстік ендік, 48°756 шығыс бойлық)», – деп нақтылады ТЖД.

Зардап шеккендер мен қираулар туралы ақпарат түскен жоқ. Құтқарушылар жағдайды бақылауда ұстап отыр.