Әскерден мүгедек болып оралған Ербаянның жағдайы қалай?

Ұлттық ұлан қатарында қызмет етіп жүріп ауыр жарақат алған Ербаян Мұхтардың Ыстамбұлдағы нейрохирургиялық операциясынан кейін Қазақстанға оралғанына 4,5 ай өтті. Оның қазіргі жағдайы туралы жеке массажисті Ұлпан Советбекқызы айтып берді.

Маманның айтуынша, Ербаян бүгінде арқа бұлшықеттерін тік ұстай алады, аяққа тұрып, мойын бұлшықеттерін басқара бастады. Сол қолы мен аяғында да реакциялар байқала бастады. Сонымен қатар, салмақ қосып, ауыз қуысы арқылы тамақтануға толық бейімделген.

Бұл — 7,5 ай ішінде жеткен үлкен жетістік. Ем баяу, бірақ тұрақты жүріп жатыр. Бұл жағдайда ең маңыздысы – үміт пен тұрақтылық, – деді ол.

Ербаян алдағы уақытта екінші кезеңдегі емін жалғастыру үшін қайтадан Ыстамбұлға аттанбақ. Маман оның толықтай сауығып кететініне сенімді.