USD
Астанада тұрғындарға АИТВ инфекциясын анықтауға арналған тегін тексеруден өту мүмкіндігі ұсынылады. Бұл қызметті елорда әкімдігіне қарасты «АИТВ инфекциясының алдын алу орталығы» көрсетеді.
Мамандардың айтуынша, АИТВ жұқтырған азаматтардың арасында медициналық көмекке кеш жүгінетіндер бар. Бұл инфекцияны дер кезінде анықтап, қажетті емді уақытында бастауға кедергі келтіреді.
Орталықтың мәліметінше, 2026 жылдың алғашқы сегіз айында елордада алғаш рет анықталған АИТВ жағдайларының 50 пайыздан астамы инфекцияның кеш кезеңіне өткен кезде белгілі болған.
Дәрігерлер мұны тұрғындардың медициналық ұйымдарға уақытында қаралмауымен және қауіп факторлары болған жағдайда АИТВ-ға тұрақты түрде тест тапсырмауымен байланыстырады. Сонымен қатар инфекция ұзақ уақыт бойы адамда ешқандай айқын белгілер байқатпай өтуі мүмкін.
Тестілеу қалай жүргізіледі?
Орталық мамандары тексеруден өтетін азаматтарға тестілеуге дейін және одан кейін кеңес береді. Мамандар инфекцияның қандай жолдармен таралатынын, одан қорғану әдістерін және тест нәтижесіне байланысты қандай әрекет жасау керектігін түсіндіреді.
Қажет болған жағдайда дәрігерлер АИТВ-ны қайта тексеруге қолайлы уақытты да ұсынады.
Мамандар тұрғындарды денсаулығына жауапкершілікпен қарап, инфекцияны ерте анықтау үшін тестілеуден уақытылы өтуге шақырады. АИТВ-ны ерте кезеңде анықтау адамның денсаулығын бақылауға және қажетті медициналық көмекті дер кезінде алуға мүмкіндік береді.
