USD
Жамбыл облысындағы Гвардейск әскери гарнизонының аумағында жаңа туған нәресте қоқыс жәшігінен табылды. Қазір сәби дәрігерлердің бақылауында, оның жағдайы тұрақты.
Оқиғаға байланысты полиция жаңа туған баланы қауіпті жағдайда қалдыру фактісі бойынша қылмыстық іс қозғады.
Жамбыл облысының Полиция департаменті мәліметінше, қазіргі уақытта нәрестенің анасын анықтау үшін жедел-іздестіру шаралары жүргізіліп жатыр. Сонымен қатар тергеушілер оқиғаның қалай болғанын және оған қатысты барлық мән-жайды анықтауда.
Табылғаннан кейін сәби медициналық мекемеге жеткізілген. Дәрігерлердің қорытындысы бойынша, оның өміріне немесе денсаулығына қазіргі уақытта қауіп төніп тұрған жоқ.
Полиция тергеу мүддесіне байланысты істің басқа да мәліметтерін әзірге жарияламай отыр. Ведомство түсіндіргендей, қылмыстық іс бойынша өзге ақпарат Қазақстан Республикасы Қылмыстық-процестік кодексінің 201-бабына сәйкес жария етілмейді.
Тергеу жалғасып жатыр.
