USD
Қазақстанда 2026 жылдың екінші тоқсанында қызметкерлердің орташа айлық жалақысы 486 388 теңгеге жетті. Бұл көрсеткіш өткен жылдың осы кезеңімен салыстырғанда 8,4%-ға жоғары. Алайда инфляцияны ескергендегі нақты жалақы 1,8%-ға төмендеген. Мұндай деректерді Ұлттық статистика бюросы жариялады.
Сәуір-маусым айларындағы медианалық жалақы 348 415 теңге болды. Ал 2026 жылдың алғашқы үш айымен салыстырғанда орташа айлық табыс 5,4%-ға өскен. Нақты жалақы бойынша тоқсандық өсім 3%-ды құрады.
Қай өңірлерде жалақы жылдам өсті?
2025 жылдың екінші тоқсанымен салыстырғанда орташа жалақының ең жоғары өсімі бірнеше өңірде тіркелді.
Ақмола облысында көрсеткіш 10,7%-ға, Абай облысында 10,6%-ға, ал Алматы қаласында 10,2%-ға артқан. Солтүстік Қазақстан облысында өсім 9,5% болса, Павлодар облысы мен Шымкентте бұл көрсеткіш 9,4%-ды құрады.
Қай салаларда жалақы көбірек өсті?
Жалақының ең қарқынды өсуі ауыл, орман және балық шаруашылығы саласында байқалды. Мұнда орташа айлық табыс бір жылда 17,5%-ға артқан.
Құрылыс саласында өсім 16,9%, қаржы және сақтандыру қызметінде 16% болды.
Өнеркәсіптегі орташа жалақы 11,4%-ға көбейді. Оның ішінде сумен жабдықтау, кәріз жүйесі, қалдықтарды жинау және жою бағыттарында табыс 14,7%-ға өскен. Электр энергиясы, газ, бу және ауаны баптау саласындағы өсім 13,6%-ды құрады.
Ең баяу өсім білім беру саласында тіркелді – 3,2%. Өнер, ойын-сауық және демалыс бағыттарында жалақы 3,4%-ға, ал ақпарат және байланыс саласында 3,8%-ға артқан.
Ең жоғары жалақы қай салада?
Атаулы жалақы көлемі бойынша қаржы және сақтандыру саласы көш бастап тұр. Мұндағы орташа көрсеткіш ел бойынша орташа жалақыдан 2,3 есе жоғары.
Тау-кен өнеркәсібі мен карьерлерді игеру саласында жалақы республикалық деңгейден шамамен екі есе көп. Ақпарат және байланыс саласындағы орташа табыс елдегі жалпы көрсеткіштен 1,7 есе жоғары болды.
