Астанада ЛРТ-ның жаңа желілері өтетін бағыттар белгілі болды

Астанада ЛРТ-ның үш жаңа желісі 26,5 шақырымға созылады

Астанада жеңіл рельсті көліктің жаңа бағыттары екі көл мен бір өзеннің су қорғау аймақтарын кесіп өтеді. Бұл туралы жобаға қатысты жарияланған экологиялық құжаттарда айтылған.

ЛРТ жобасының екінші кезеңі аясында елордада екінші, үшінші және төртінші желілерді салу жоспарланып отыр. Жаңа бағыттардың жалпы ұзындығы шамамен 26,5 шақырымды құрайды.

Құжаттарға сәйкес, екінші және үшінші желілер, сондай-ақ ЛРТ депосы толығымен Астана қаласының аумағында орналасады. Ал төртінші желі елорда шегінен шығып, Қосшы қаласының әкімшілік аумағы арқылы өтеді.

Жоба іске асқан жағдайда, жаңа желілер елорданың қоғамдық көлік инфрақұрылымын кеңейтіп, қала ішіндегі қатынасты жақсартуға бағытталмақ.