USD
Қазақстанда 729 адам мемлекеттік әлеуметтік төлемдерден өз еркімен бас тартты
Қазақстанда 700-ден астам азамат мемлекеттен алатын әлеуметтік көмектен бас тартқан. Еңбек және халықты әлеуметтік қорғау министрлігінің хабарлауынша, 2026 жылдың қазан айында іске қосылған арнайы цифрлық қызмет арқылы осындай шешім қабылдағандар саны 729 адамға жеткен.
Ведомство өкілдерінің айтуынша, бұл қадам азаматтардың әлеуметтік жауапкершілігі мен қоғамдағы өзара қолдау мәдениетін көрсетеді. Яғни, өз күнін өзі көріп, отбасын қаржылай қамтамасыз етуге мүмкіндігі бар тұрғындар мемлекеттік көмекті қажет етпейтінін білдірген.
Айта кетейік, 2027 жылдың 1 қаңтарынан бастап әлеуметтік жәрдемақының 36 түрінің 12-сін тағайындау тәртібіне өзгерістер енгізіледі. Енді мемлекеттік қолдау ең алдымен нақты мұқтаж азаматтарға бағытталып, атаулылық қағидаты негізінде көрсетіледі.
Әлеуметтік төлемдерден бас тартуға мүмкіндік беретін қызмет eGov Mobile мобильді қосымшасында қолжетімді. Оның көмегімен жәрдемақы алушылар мемлекеттік органдарға бармай-ақ, электронды өтініш арқылы жекелеген әлеуметтік қолдау түрлерінен бас тарта алады.
Министрлік бұл шешім азаматтарға міндеттелмейтінін, әркімнің жеке таңдауына байланысты екенін атап өтті. Қызмет негізінен тұрақты табысы бар, материалдық жағдайы жақсы және өз отбасын дербес қамтамасыз ете алатын адамдарға арналған.
Сонымен қатар, азаматтың қаржылық жағдайы кейіннен нашарласа, ол мемлекеттік әлеуметтік көмек алу үшін қайта өтініш бере алады. Мұндай өтініштер қолданыстағы заңнама талаптарына сәйкес қаралады.
