USD
Финляндия полициясы 2024 жылдың 15 мамырында із-түссіз жоғалған 10 адамнан тұратын отбасын бір жылдан бері таба алмай келеді.
Бұл туралы Blick басылымы жазды.
Жеті бала мен жүкті әйел жоғалған
Жоғалғандар қатарында жасы 3 пен 17 аралығындағы жеті бала мен ата-анасы бар. Сонымен қатар, әйел адам жоғалған кезде жүкті болған. Тергеу нұсқасына сәйкес, отбасы әдейі жасырынып жүруі мүмкін. Балалар әлеуметтік қызметтің бақылауында болған. Алдын ала мәлімет бойынша, отбасы шағын жүк көлігімен елден кетіп қалған.
Іс халықаралық деңгейге шықты
Фин полициясы Солтүстік Еуропа елдерінен көмек сұрады, отбасыға халықаралық іздеу ордері жарияланды.
Жыл бойы жүздеген хабарлама түскенмен, олардың ешқайсысы нақты дәлелмен расталмады. Бас тергеуші Тони Раум мәлімдегендей, ешқандай физикалық немесе цифрлық із табылмаған. Полиция отбасыға көмектескен үшінші тараптардың немесе ұйымдасқан топтың болуын жоққа шығармайды.
Полиция куәгерлерден ақпарат сұрайды
Финляндия құқық қорғау органдары отбасы туралы қандай да бір мәлімет білетіндерден байланысқа шығуды сұрайды. Тергеу жалғасуда.
