USD
Қазақстанда медициналық ұйымдардағы инфекциялық қауіпсіздік талаптары қатаңдатылмақ. Денсаулық сақтау министрлігі меншік түріне қарамастан, барлық клиникаларда ішкі инфекциялық аудит жүргізуді міндеттейтін жаңа тәртіп енгізуді жоспарлап отыр.
Ведомство тиісті бұйрық жобасын әзірледі. Құжаттың негізгі мақсаты – ауруханаішілік инфекциялардың алдын алу және медициналық көмек көрсету кезінде пациенттер үшін қауіпсіз жағдай қалыптастыру.
Министрліктің мәліметінше, бұл мәселе әлем бойынша өзекті болып отыр. Дүниежүзілік денсаулық сақтау ұйымы әрбір он пациенттің біреуі медициналық мекемеде ем қабылдау барысында инфекция жұқтыруы мүмкін екенін атап өткен.
Қазақстандағы көрсеткіш те алаңдатады. 2025 жылы ауруханаішілік инфекциялардың тіркелу деңгейі 2024 жылмен салыстырғанда 1,41 есеге артқан. Іріңді-септикалық асқынулардың басым бөлігі босандыру ұйымдарында анықталған.
Клиникаларда не бақыланады?
Жаңа талаптарға сәйкес, ішкі инфекциялық аудит медициналық ұйымдардағы инфекциялық бақылау жүйесінің тұрақты бөлігіне айналады. Мамандар ықтимал қауіптерді ерте анықтап, олардың себептерін жоюға және инфекциялардың қайта таралуына жол бермеуге назар аударады.
Аудит барысында медицина қызметкерлерінің қол тазалығын сақтау тәртібі, медициналық құралдарды залалсыздандыру сапасы және жеке қорғаныш құралдарын пайдалану талаптары тексеріледі. Сонымен қатар хирургиялық процедуралардың қауіпсіздігі мен медициналық қалдықтарды жою ережелерінің орындалуы бақыланады.
Дәріге төзімді микроорганизмдердің таралуын тежеуге де ерекше көңіл бөлінбек. Егер тексеру кезінде кемшіліктер анықталса, медициналық ұйым оларды жоюға арналған нақты іс-шаралар жоспарын әзірлейді. Құжатта тиісті жұмыстарды орындау мерзімі мен жауапты қызметкерлер көрсетіледі.
Денсаулық сақтау министрлігінің пікірінше, жаңа жүйе ауруханаішілік инфекциялардың таралу қаупін төмендетуге, пациенттердің стационарда болу уақытын қысқартуға және медициналық қызметтің қауіпсіздігін арттыруға мүмкіндік береді.
