USD
Бас прокуратура қылмыстық істерді кассациялық тәртіппен қайта қарау нәтижелеріне қатысты бірқатар мәлімет жариялады. Ведомствоның хабарлауынша, сот үкімдерін қайта қарау барысында ауыр қылмыс жасағанына қарамастан, бастапқыда жеңіл жаза алған адамдарға қатысты істер де анықталған.
Прокуратура мәліметінше, президенттің тапсырмасына сәйкес 2025 жылғы 1 шілдеден бастап кассациялық соттар өз жұмысын бастады. Жаңа жүйе аясында қылмыстық істерді қайта қарау мүмкіндігі кеңейтіліп, істер судьялардың алдын ала қарауынсыз кассациялық тәртіпте қарала бастады.
Осы механизм арқылы прокуратура органдары сотта кінәсіз деп танылуы тиіс адамдарға қатысты шешімдермен қатар, ауыр қылмыс үшін тиісті деңгейде жаза тағайындалмаған істерді де қайта көтеріп жатыр.
Солардың бірі – тоғыз жасар қызға қатысты қылмыстық іс.
Бас прокуратураның мәліметінше, Азамат Ж. бастапқы сот үкімімен тоғыз жастағы қызға қатысты азғындық әрекет жасады деп танылған. Алайда прокуратураның талабынан кейін іс кассациялық сотта қайта қаралған.
Қайта тергеу және сот талқылауы барысында істің бастапқы саралануы өзгертіліп, балаға қатысты әрекет сексуалдық сипаттағы зорлық ретінде бағаланған.
Нәтижесінде бұрын тағайындалған жаза жойылып, ер адамға өмір бойына бас бостандығынан айыру жазасы белгіленді.
Бас прокуратура Қазақстан заңнамасына сәйкес кәмелетке толмағандарға қатысты сексуалдық сипаттағы ауыр қылмыс жасаған адамдарға қатаң жаза қарастырылғанын атап өтті.
Ведомство кассациялық соттардың жұмысы сот шешімдерін қайта бағалауға және заң талаптарына сәйкес келмейтін үкімдерді өзгертуге мүмкіндік беріп отырғанын мәлімдеді.
