USD
Қазақстанда 1 маусым – Балаларды қорғау күні мемлекеттік мереке ретінде белгіленуі мүмкін.
Бұл туралы Еңбек және халықты әлеуметтік қорғау министрлігінің Мәжіліс депутатының сауалына берген жауабында айтылды.
Депутаттың бастамасы
Мәжіліс депутаты Кенжегүл Сейтжан 1 маусым – Балаларды қорғау күнін мемлекеттік мереке ретінде тануды ұсынды. Оның айтуынша, балалар – елдің стратегиялық ресурсы әрі болашағының негізі. Сондықтан олардың қауіпсіз, салауатты және жан-жақты дамуы үшін жағдай жасау мемлекеттік саясаттың басты басымдығына айналуы тиіс.
Балаларды қорғау күнін мемлекеттік деңгейде атап өту – отбасы институтын нығайтып, ұрпақ тәрбиесіне оң әсер етеді, – деді депутат.
Сонымен қатар, Кенжегүл Сейтжан демалыс күндерін жоспарлаудың жаңа жүйесін енгізуді де ұсынды. Атап айтқанда, демалыс күндерін алдағы екі жылға алдын ала бекіту қажет деп санайды. Бұл ұсыныс кәсіпкерлерге ұзақ мерзімді жоспар құруға, ал азаматтарға демалыс пен отбасылық шараларды ертерек ұйымдастыруға мүмкіндік береді.
Министрлік пікірі
Депутаттық сауалға жауап берген Еңбек және халықты әлеуметтік қорғау министрлігі демалыс күндерін екі жыл бұрын бекіту идеясын қолдамады. Министр Светлана Жақыпованың айтуынша, демалыс күндерін ауыстыру жыл сайын елдегі экономикалық, саяси және эпидемиологиялық жағдайға байланысты жеке-жеке қарастырылады.
Қазіргі қолданыстағы тәртіп – демалыс күндерін келер жылдың жұмыс және мереке күндерінің сәйкестігіне қарай алдын ала ауыстыру – ең оңтайлы нұсқа, – делінген министрлік жауабында.
1 маусым – мемлекеттік мереке болуы мүмкін
Ал Балаларды қорғау күнін мемлекеттік мереке ретінде бекіту бастамасы министрлік тарапынан қолдау тапты.
Бұл мейрам ата-аналар мен балаларға бірлесіп уақыт өткізуге, мәдени, тәрбиелік және қоғамдық іс-шараларға қатысуға мүмкіндік береді. Бұл баланың психоэмоциялық жай-күйіне оң әсер етіп, отбасындағы қауіпсіздік сезімін арттырады, – деп атап өтті министрлік өкілдері.
Осыған байланысты, 1 маусымды – Балаларды қорғау күнін мемлекеттік мереке ретінде белгілеу отбасылық құндылықтарды нығайтуға сеп болады деп есептейді.
