USD
Қостанайда әскери комиссариат қызметкерлері студенттерге емтихан кезінде келген.
Әлеуметтік желіде оқиға орнынан видео тарады.
– Бүгін Қостанай құрылыс колледжіне әскери комиссариат өкілдері келіп, әңгімелесу өткіземіз деген желеумен үшінші курс студенттерін топ-топпен алып кетіп, әскери комиссариатқа жеткізген. Бұл кезде студенттер қорытынды емтихан тапсырып жатқан болатын. Ережеге сәйкес, оқу 30 маусымда аяқталады, яғни сол күнге дейін студенттер әскерге шақырылмайды, – дейді видео авторы.
ҚОРҒАНЫС ДЕПАРТАМЕНТІНІҢ ӨКІЛДЕРІ НЕ ДЕЙДІ
Бұл жайтқа қатысты Қостанай облысы бойынша қорғаныс департаментінің өкілдері жауап берді. Олардың сөзінше, 16 маусымда Қостанай құрылыс колледжі әкімшілігімен алдын ала келісім бойынша әскери қызмет мәселелері жөнінде түсіндіру жұмыстарын жүргізу мақсатында 2025 жылғы түлектермен кездесу ұйымдастырылыпты.
Оқу бағдарламасын аяқтаған және жарамды кейінге шегеруі жоқ студенттер облыстық жиын пунктіне шақырылып, алдын ала рәсімдерден – медициналық тексеру мен психологиялық тестілеуден өткен. Департамент өкілдері студенттердің ешқайсысы күшпен немесе себепсіз ұсталған жоқ дейді.
– Ата-аналар мен оқытушылардың алаңдаушылығын ескере отырып, сол жерде қосымша түсіндіру жұмыстары жүргізілді. Көптеген ата-ана әскери қызмет туралы толық ақпарат алған соң, ұлдарын борышын өтеуге жіберуге келісім берді. Қорғаныс істері жөніндегі департамент заңнама талаптарын, соның ішінде студенттердің оқу біткенге дейін кейінге шегеру құқығын қатаң сақтайды, – делінген департаменттің Ұлысмедиаға берген жауабында.
30 маусымға дейін оқуын жалғастырып жатқан барлық студенттер әскерге шақырылмайды. Департамент мәліметінше, даулы жағдайлар бойынша әрқайсысы жеке қаралады.
