USD
Бүгін Құрылтайдың жалпы отырысында депутаттардың жұмыс тәртібін, заң шығару процесін және палатаның қызметін ұйымдастыруды айқындайтын жаңа Регламент жобасы қабылданды. Құжат 31 тарау мен 310 тармақтан тұрады.
Жаңа ережеге сәйкес, Құрылтай қызметінің негізгі форматы — сессия. Кезекті сессия жыл сайын қыркүйектің алғашқы жұмыс күнінде басталып, маусым айының соңғы жұмыс күніне дейін жалғасады.
Сессия аралығында депутаттар заңнамалық бастамалармен жұмыс істеумен қатар, сайлаушылармен кездесулер өткізеді. Өңірлерге бару үшін әр депутатқа күнтізбелік 10 күнге дейін уақыт беріледі. Сонымен бірге әр сессия барысында депутаттар кемінде екі рет өңірлерге шығуы тиіс.
Құрылтай отырыстары қай күндері өтеді?
Регламентте жалпы отырыстарды өткізу кестесі де нақты белгіленген. Енді Құрылтайдың жалпы отырыстары сәрсенбі немесе бейсенбі күндері ұйымдастырылады. Құрылтай тыңдаулары жұмаға, ал Үкімет сағаты дүйсенбіге жоспарланады.
Жалпы отырыс депутаттардың кемінде үштен екісі қатысқан жағдайда заңды болып саналады. Бұл ретте 145 депутаттың кемінде 97-сі отырысқа қатысуы қажет.
Заң жобалары үш оқылымда қаралады
Регламенттің негізгі бөлімдерінің бірі заң шығару процесіне арналған. Жаңа тәртіп бойынша заң жобалары Құрылтайда үш оқылымнан өтеді.
Бірінші оқылымда заң жобасының мақсаты, тұжырымдамасы мен негізгі нормалары талқыланады. Екінші оқылым кезінде депутаттар енгізілген өзгерістер мен толықтыруларды қарайды. Үшінші оқылымда құжаттың Конституцияға және қолданыстағы заңнамаға сәйкестігі тексеріліп, редакциялық және техникалық мәселелер пысықталады.
Конституциялық заңнама, сот жүйесі және құқық қорғау органдары комитетінің мүшесі Снежанна Имашева заң шығару тәртібінің жаңа Регламентте маңызды орын алатынын атап өтті.
Депутаттық сауалға жауап беру мерзімі белгіленді
Құжат депутаттық сауалдарды жолдау тәртібін де реттейді. Депутаттар Премьер-министрге, Үкімет мүшелеріне, бірқатар мемлекеттік органдардың басшыларына және өңір әкімдеріне сауал жолдай алады.
Оларға жауап бір айдан аспайтын мерзім ішінде берілуі тиіс.
Сонымен қатар Үкімет сағаты парламенттік бақылаудың негізгі құралдарының бірі ретінде қарастырылған. Оның барысында депутаттар Үкімет өкілдерінің баяндамаларын тыңдап, сұрақтар қойып, өзекті мәселелерді талқылайды. Бұдан бөлек, Құрылтайда арнайы тыңдаулар өткізу мүмкіндігі қарастырылған.
Парламенттік оппозицияға да кепілдіктер берілді
Жаңа Регламентте парламенттік оппозицияның құқықтарына қатысты нормалар да енгізілген. Оппозиция өкілдері сессия барысында кемінде бір рет тыңдау өткізуге бастамашылық жасай алады.
Сонымен бірге оларға жылына кемінде екі рет Үкімет сағатының күн тәртібін айқындауға мүмкіндік беріледі. Тұрақты комитеттердің басшылық құрамында оппозиция өкілдерінің болуы да көзделген.
Депутаттардың жауапкершілігі күшейтіледі
Құжат депутаттардың тәртібі мен жауапкершілігіне қатысты талаптарды да белгілейді. Себепсіз түрде отырыстарға жүйелі қатыспау, өз дауысын басқа депутатқа беру немесе депутаттық әдеп талаптарын бұзу жағдайларында тиісті шаралар қолданылмақ.
Құрылтай жұмысының ашықтығын қамтамасыз ету үшін жалпы отырыстар, тыңдаулар мен Үкімет сағаттары стенографияланып, бейнежазбаға түсіріледі. Бұл материалдарды Құрылтайдың интернет-ресурсында жариялау жоспарланып отыр.
Айта кетейік, бүгінгі жалпы отырысқа 145 депутаттың 140-ы қатысуда.
