USD
Қонаев қаласының тұрғыны Қапшағай су қоймасында адам өмірін құтқаруға әрекет жасап, қайғылы жағдайда көз жұмды. Бұл туралы қала әкімі Асхат Бердіханов Instagram парақшасында хабарлады.
Әкімнің мәліметінше, Андрей Козятинский қиын сәтте көмекке мұқтаж жанды көріп, қауіпке қарамастан оны құтқаруға ұмтылған. Алайда ер азаматтың өзі судан шыға алмай, қаза тапқан.
Асхат Бердіханов марқұмның әрекетін нағыз ерлік пен адамгершіліктің белгісі деп атап өтті. Оның айтуынша, Андрей өз қауіпсіздігін ойламай, басқа адамның өмірін сақтап қалуға бар күшін салған.
«Бұл — батылдық пен жанқиярлықтың, адамға деген шынайы жанашырлықтың көрінісі. Осындай қиын сәтте өзгенің өмірін бірінші орынға қоя білу үлкен жүрек пен мықты мінезді талап етеді», — деп жазды қала әкімі.
Қонаев қаласының әкімі марқұмның әкесі мен ағасына, сондай-ақ туған-туыстары мен жақындарына көңіл айтып, қайғысына ортақтасты.
Сонымен қатар ол бірнеше жыл бұрын Андрей Козятинскийдің анасы да өмірден өткенін атап өтті. Қайғылы оқиғаның нақты қалай болғаны және мән-жайы әзірге анықталып жатыр.
