USD
Қазақстандық теннисші Елена Рыбакинаның 2026 жылғы жарыстардан алған жүлде қоры белгілі болды. Sportico.com дерегіне сәйкес, Рыбакина биыл әйелдер арасындағы ең жоғары табысқа қол жеткізген теннисші атанды, деп хабарлайды Azattyq Rýhy.
Қазақстандық спортшының маусым басынан бергі турнирлік сыйақысы 10,88 миллион долларға жеткен. Бұл көрсеткішке оның «Үлкен дулыға» додаларындағы нәтижелері айтарлықтай әсер еткен.
Рыбакина жыл басында Australian Open турнирінде чемпион атанып, жеңісі үшін шамамен 2,8 миллион доллар сыйақы алды. Кейін АҚШ ашық чемпионатында да топ жарып, жүлде қорынан қомақты қаржы иеленді. US Open турнирі «Үлкен дулыға» жарыстары арасында чемпионға ең жоғары сыйақы ұсынатын додалардың бірі саналады.
2026 жылғы нәтижелерінің арқасында Елена Рыбакина «Үлкен дулыға» санатындағы жарыстарда үш рет чемпион болған теннисшілер қатарына қосылды. Сонымен қатар қазақстандық спортшы мансабында алғаш рет әлемдік рейтингте бірінші орынға көтерілді.
Әйелдер арасындағы табыс көрсеткішінде Рыбакинадан кейінгі теннисшілердің нақты тізімі маусым соңындағы нәтижелерге байланысты өзгеруі мүмкін. Ал ерлер арасында биылғы турнирлерден ең көп сыйақы алған ойыншы – Германия өкілі Александр Зверев. Оның маусымдық табысы 14,71 миллион доллар болған.
Зверев биыл АҚШ ашық чемпионатында жеңіске жетіп, 5,5 миллион доллар алды. Сондай-ақ ол «Ролан Гаррос» турнирінде чемпион атанып, тағы 3,27 миллион доллар сыйақы иеленген. Уимблдонда финалға дейін жетіп, Australian Open жарысында жартылай финалда өнер көрсетті.
Ерлер арасындағы екінші көрсеткіш Италия өкілі Янник Синнерге тиесілі. Оның 2026 жылғы турнирлерден алған жүлдесі 11,62 миллион долларды құрады. Синнер маусым басындағы алғашқы бес ATP Masters 1000 турнирінің барлығында жеңіске жетіп, кейін Уимблдонда алғаш рет «Үлкен дулыға» чемпионы атанды.
Жалпы, биыл кемінде 2 миллион доллар жүлде алған теннисшілер саны 50-ге жеткен. Оның 23-і – әйелдер, 27-сі – ерлер.
Маусымның маңызды жарыстарының бірі қараша айында өтетін ATP және WTA Finals турнирлері болмақ. Былтыр үздік сегіз теннисші қатысқан бұл додалардың әрқайсысында жүлде қоры 15,5 миллион долларды құраған. Чемпионға 5 миллион доллардан астам сыйақы берілген.
