USD
Қарағанды облысында темір кенін лицензиясыз өндіріп, шетелге заңсыз шығарғандарға қатысты сот үкімі шықты.
Облыстық мамандандырылған табиғат қорғау прокуратурасының мәліметінше, заңсыз жер қойнауын пайдалану фактілері қадағалау жұмысы барысында анықталған. Осыдан кейін арнайы прокурорлар сотқа дейінгі тергеп-тексеруді бастаған.
Тергеу барысында өңірдегі кәсіпорындардың бірі төрт жыл бойы тиісті лицензиясыз темір кенін өндіріп, оны Қазақстаннан тыс жерлерге шығарып отырғаны белгілі болды. Салдарынан мемлекетке келтірілген шығын 2 миллиард теңгеден асты.
Қылмыстық іс аясында үш күдікті қамауға алынып, жалпы құны 360 миллион теңгеден асатын мүлікке тыйым салынды. Іс бойынша мемлекеттік айыптауды прокуратура қолдады. Нәтижесінде Қарағанды облысының Шет аудандық соты үш айыпталушыны заңсыз жер қойнауын пайдалану дерегі бойынша кінәлі деп танып, оларды әртүрлі мерзімге бас бостандығынан айыру жазасына кесті.
Сот үкімі әзірге заңды күшіне енген жоқ.
