Шымкентте бензовоз аударылып, өртеніп кетті: 25 жастағы жүргізуші қаза тапты
Шымкент қаласындағы Ташкент тасжолында ауыр жол апаты орын алып, соңы қайғылы жағдаймен аяқталды. Жанармай тасымалдаған бензовоз жолдан шығып, аударылғаннан кейін өртеніп кеткен. Апат салдарынан 25 жастағы жүргізуші көз жұмды.
Оқиға 18 қараша күні сағат 16:00 шамасында Тұран ауданындағы Шымкент – Ташкент – Термез автожолында болған.
Оқиғаның куәгері Жұмабек Жолдастың айтуынша, ол үйінде отырған кезде қатты жарылысқа ұқсас дыбыс естіген. Сыртқа шыққанда жол бойында бензовоздың жанып жатқанын байқап, дереу өрт сөндірушілерге хабар берген. Сонымен қатар отбасы мүшелері мен балаларды қауіпсіз жерге шығарған.
Куәгердің сөзінше, өрт тұрғын үйлерге өте жақын жерде болған. Ол бұл аумақта жол-көлік оқиғалары жиі тіркелетінін айтып, бұған дейін де қауіпсіздік шараларын күшейту туралы ұсыныс жасағанын жеткізді. Атап айтқанда, өткен жазда осы маңға бейнебақылау камерасын орнату жөнінде полицияға өтініш білдірген.
Шымкент қалалық Полиция департаментінің мәліметінше, жүк көлігінің жүргізушісі рульге ие бола алмай, жол жиегіндегі орға түсіп кеткен. Салдарынан бензовоз аударылып, артынша отқа оранған.
Төтенше жағдайлар департаментіне өрт туралы хабар сағат 15:58-де түскен. Оқиға орнына өрт сөндіру бөлімшелері жоғары шақырту санатымен жіберілген. Құтқарушылар көлік пен төгілген жанармайды қоса алғанда, 60 шаршы метр аумақтағы өртті сөндірді.
Өрт толық ауыздықталғаннан кейін мамандар бензовоз кабинасынан 25 жастағы жүргізушінің мәйітін тапты.
Аталған факті бойынша полиция қылмыстық іс қозғады. Қазіргі уақытта мамандар апаттың себептері мен барлық мән-жайын анықтап жатыр.
USD