USD
Солтүстік Қазақстан облысында медициналық қызметкерге күш көрсеткен 51 жастағы ер адамға қатысты қылмыстық іс тіркелді. Оқиға емхана ғимаратында болған.
Солтүстік Қазақстан облысы полиция департаментінің мәліметінше, жағдай 17 тамыз күні таңертең болған. Қабылдауға келген қала тұрғыны дәрігермен сөйлесу барысында жанжал шығарған.
Әңгіме кезінде медицина қызметкері ер адамға ескерту жасаған. Бұған ашуланған азамат дәрігерге агрессия танытып, оның бет тұсынан соққы жасаған. Медициналық қызметкер болған жағдайға байланысты полицияға арызданған.
Аталған дерек бойынша құқық қорғау органдары қызметтік міндетін орындап жүрген медицина қызметкеріне күш қолдану фактісі бойынша қылмыстық іс қозғады. Қазір оқиғаның мән-жайы анықталып жатыр.
Полиция бұл СҚО аумағында биыл медицина қызметкеріне қатысты күш қолданудың екінші жағдайы екенін хабарлады.
Бұған дейін маусым айында Шал ақын ауданында жол-көлік оқиғасы болған жерде зардап шеккендерге медициналық көмек көрсетіп жүрген маманға мас ер адам шабуыл жасаған. Сот оның кінәсін анықтап, 1,5 жылға бас бостандығынан айыру жазасын тағайындаған.
Медицина қызметкерлерін қорғауға жауапкершілік күшейтілді
Қазақстанда медицина қызметкерлерінің қауіпсіздігіне қатысты заң талаптары да күшейтілді. Биыл Қылмыстық кодекске 380-3-бап енгізіліп, медициналық қызметкерге немесе жедел жәрдем көлігінің жүргізушісіне қызметтік міндетін орындау кезінде қорқыту немесе күш көрсету үшін қылмыстық жауапкершілік белгіленді.
Полицияның айтуынша, бұл норма медициналық көмек көрсетіп жүрген мамандардың қауіпсіздігін қамтамасыз етуге бағытталған. Енді дәрігерлер мен жедел жәрдем қызметкерлеріне қатысты агрессивті әрекеттер қылмыстық құқықбұзушылық ретінде қаралуы мүмкін.
