Тоқаев Қазақстанның цифрлық экономика құру бағытындағы жоспарын жариялады

Қазақстан Президенті Қасым-Жомарт Тоқаев елдің технологиялық дамуын жалғастырып, жасанды интеллектіге негізделген цифрлық экономика қалыптастыру қажеттігін айтты. Бұл туралы ол Қазақстан халқына Жолдауында мәлімдеді.

Мемлекет басшысының сөзінше, биыл Цифрландыру және жасанды интеллект жылы аясында Қазақстанның технологиялық әлеуетін арттыруға бағытталған жұмыстарға жаңа серпін берілді. Ендігі міндет — осы бастамаларды жүйелі түрде жалғастырып, заманауи технологияларды экономиканың түрлі саласына кеңінен енгізу.

Президент бұл іске Үкіметпен қатар ұлттық компаниялар мен креативті индустрия өкілдері де белсенді қатысуы керектігін атап өтті. Оның пікірінше, цифрлық дәуірдің талаптарына бейімделу үшін ескірген тәсілдерден бас тартып, қоғам дамуының жаңа негізін қалыптастыру қажет.

Тоқаев технологиялық өзгерістерді тек экономиканы жаңғырту құралы ретінде емес, азаматтардың өмір сүру сапасын жақсартудың маңызды мүмкіндігі ретінде қарастыру керектігін жеткізді. Әсіресе, озық технологияларды дамыту келешек ұрпаққа жаңа мүмкіндіктер ашуға бағытталуы тиіс.

Мемлекет басшысы цифрлық дәуірдің күрделілігі мен ықтимал қауіптеріне қарамастан, Қазақстанның негізгі стратегиялық бағыты өзгермейтінін айтты. Оның сөзінше, елдің басты мақсаты — жаңа тұрпатты мемлекет қалыптастыру, жаңғыру мен жаңару жолын жалғастыру.