Тоқаев Ресей Жоғарғы сотының төрағасы Игорь Красновпен сот саласындағы ынтымақтастықты талқылады
Мемлекет басшысы Қасым-Жомарт Тоқаев Ресей Жоғарғы сотының төрағасы Игорь Красновты қабылдады. Кездесу барысында екі ел арасындағы құқық саласындағы байланыстарды нығайту және сот жүйесін дамыту мәселелері сөз болды.
Ақорданың мәліметінше, Президент Қазақстан мен Ресей арасындағы қарым-қатынастың тарихи сабақтастыққа, тату көршілікке және халықтар арасындағы өзара құрметке негізделгенін атап өтті.
Сондай-ақ Мемлекет басшысы екіжақты байланыстардың стратегиялық серіктестік пен одақтастық деңгейіне көтерілгенін айтып, бұл ынтымақтастықтың құқық саласын қоса алғанда, барлық бағытта дамып келе жатқанын жеткізді.
Кездесу кезінде Қасым-Жомарт Тоқаев Қазақстандағы мемлекеттік-құқықтық жүйені жаңғыртуға бағытталған саяси реформаларға да тоқталды.
Өз кезегінде Игорь Краснов Қазақстанның сот органдарымен өзара іс-қимылдың белсенді дамып жатқанын атап өтті. Оның айтуынша, екі елдің жоғары сот органдары тарихта алғаш рет ынтымақтастық туралы келісімге қол қойған.
Құжат кәсіби тәжірибе алмасуға, сот төрелігі жүйесін цифрландыруға және жасанды интеллект технологияларын енгізуге мүмкіндік береді.
Сонымен қатар Ресей Жоғарғы сотының төрағасы ғылым мен білім беру салаларындағы байланысты кеңейтуге қызығушылық білдірді. Атап айтқанда, сот қызметкерлерінің біліктілігін арттыру және цифрлық дағдыларын дамыту бағытындағы бірлескен жұмыстарға назар аударылды.
USD