USD
Қазақстанда 2025 жылдың 1 қаңтарынан бастап зейнетақы төлемдері айтарлықтай өседі.
Базалық зейнетақы 6,5 пайызға, ал ынтымақты зейнетақы 8,5 пайызға артты. Бұл өсім Ұлттық банк белгілеген инфляция болжамына сәйкес жүргізілді. Бұл туралы ҚР Еңбек және халықты әлеуметтік қорғау министрлігі мәлімдеді.
Мемлекет басшысының тапсырмасына сәйкес, 2023 жылдан бастап 5 жыл ішінде ең төменгі базалық зейнетақы мөлшері жыл сайын ұлғайып, 2028 жылға дейін күнкөріс минимумының 70 пайызына дейін жетеді, ал ең жоғары мөлшері 120 пайызға дейін өседі.
Министрлік мәліметінше:
- 2025 жылдың 1 қаңтарынан бастап ең төменгі базалық зейнетақы мөлшері күнкөріс минимумының 65%-ынан 70%-ына дейін өсіп, 32 360 теңгені құрады;
- Ең жоғары мөлшері 105%-дан 110%-ға дейін көбейіп, 50 851 теңгеге жетті.
2025 жылғы 1 маусымдағы жағдай бойынша Қазақстанда орташа жиынтық зейнетақы мөлшері 143 502 теңге, оның ішінде ынтымақты зейнетақы — 95 814 теңге, базалық зейнетақы — 47 688 теңге болды.
Базалық зейнетақы қалай есептеледі?
2018 жылдың 1 шілдесінен бастап базалық зейнетақы әр зейнеткерге жеке тағайындалады. Есептеуде адамның зейнетақы жүйесіне қатысу өтілі ескеріледі. Бұл өтілге:
- 1998 жылдың 1 қаңтарына дейінгі еңбек өтілі;
- Міндетті зейнетақы жарналары төленген кезеңдер қосылады.
Егер зейнетақы жүйесіне қатысу өтілі 10 жыл немесе одан аз болса (немесе мүлде болмаса), базалық зейнетақы күнкөріс минимумының 70%-ына тең болады. Әр қосымша жыл үшін бұл көрсеткіш 2%-ға артады. Мысалы:
- 20 жылдық өтіл — 90%;
- 30 жыл және одан көп — 110% (максималды мөлшер).
Ай сайын БЖЗҚ-ға бірнеше мәрте жарна төленсе де, есептелетін өтіл бір ай болып саналады.
Министрлік ескертуі:
Қаншалықты тұрақты және толық көлемде міндетті зейнетақы жарналары төленсе, зейнет жасында базалық зейнетақы мөлшері де соғұрлым жоғары болады. Ал ынтымақты зейнетақы төлемі азаматтың 1998 жылғы 1 қаңтардағы еңбек өтіліне (кемінде 6 ай болуға тиіс) және зейнетке дейінгі кезеңдегі орташа айлық табысына байланысты есептеледі.
