USD
Нұрай Серікбайға қатысты даулы пікір жазған азаматқа әкімшілік іс қозғалды
Әлеуметтік желіде қаза болған Нұрай Серікбайға қатысты қорлайтын сипаттағы пікір қалдырған азаматқа байланысты әкімшілік іс тіркелді.
Марқұмның отбасы мүшелерінің мүддесін қорғап жүрген адвокат Аянхан Омаровтың айтуынша, @dkraken9 аккаунтының иесіне қатысты полиция қызметкерлері Қазақстан Республикасы Әкімшілік құқық бұзушылық туралы кодексінің 456-2-бабы 3-бөлігі бойынша әкімшілік құқық бұзушылық туралы хаттама толтырған.
Іс енді сот қарауына жіберіледі. Заң талаптарына сәйкес, құқық бұзушылық дәлелденген жағдайда азаматқа 20 айлық есептік көрсеткіш көлемінде, яғни 86 500 теңге мөлшерінде айыппұл салынуы мүмкін.
Адвокаттың сөзінше, аталған тұлға әлеуметтік желіде Нұрай Серікбайға қатысты «72 рет пышақ тығар едім» деген мазмұндағы пікір жариялаған. Оның айтуынша, бұл жағдай интернет кеңістігіндегі жазбалар үшін де заң алдында жауапкершілік қарастырылатынын көрсетеді.
«Әлеуметтік желіде құқыққа қайшы контент жариялағаны үшін әкімшілік жауапкершілік мәселесі қаралады. Сонымен қатар бұл азаматтың бұған дейін де осындай сипаттағы өзге пікірлер қалдырғаны анықталды», – деді Аянхан Омаров.
Істің сотта қаралу нәтижесі кейін белгілі болады.
