USD
Ақтауда жасөспірімдер оқушыны ұрып, әрекетін видеоға түсірген
Ақтауда мектеп оқушысына жасалған шабуыл бойынша полиция тергеу жүргізіп жатыр. Зардап шеккен баланың жақындарының айтуынша, жасөспірімдер оны соққыға жығып қана қоймай, болған жағдайды видеоға түсіріп, басқа адамды қорқыту үшін пайдаланған.
Туыстарының мәліметінше, оқиға таңғы уақытта болған. Мектеп оқушысы дүкенге бара жатқан кезде оны 16-17 жастағы екі жасөспірім тоқтатқан. Олардың айтуынша, күдіктілер баладан үйінен белгілі бір жігітті сыртқа шығаруын талап еткен.
Оқушы бұл талаптан бас тартқаннан кейін, жасөспірімдер оған күш қолданған. Шабуыл сәтін олар телефонға жазып алып, кейін видеоны басқа азаматқа жіберген. Осы арқылы оны да қорқытып, «егер шықпасаң, досыңды осылай ұрамыз» деген мазмұнда қысым көрсеткені айтылды.
Оқиғадан кейін екі жасөспірім ата-аналарымен бірге полиция бөлімшесіне жеткізілген. Жәбірленуші тараптың сөзінше, олар жасаған әрекеттерін мойындаған және полиция қызметкерлерінің қатысуымен де өзін дөрекі ұстаған.
Соққыға түскен оқушы медициналық мекемеге жатқызылды. Оның отбасы құқық қорғау органдарынан істі толық әрі әділ қарап, кінәлі тұлғалардың әрекетіне заң аясында баға беруді сұрады.
Маңғыстау облысының Полиция департаменті аталған жағдай бойынша қылмыстық іс қозғалғанын хабарлады. Ведомство мәліметінше, оқиғаға қатысы бар барлық адамның жеке басы анықталып, олар заңды өкілдерімен бірге полицияға жеткізілген.
Қазіргі таңда тергеу амалдары жүргізіліп жатыр. Сонымен қатар кәмелетке толмаған балалардың тәрбиесіне жауапкершілікпен қарамаған ата-аналарына қатысты заңнамаға сәйкес шаралар қабылданған. Материалдар кәмелетке толмағандардың істері жөніндегі комиссияның қарауына жіберілді.
