USD
Әзербайжанда 12 жастағы қыздың өліміне қатысты тергеу жүріп жатыр
Әзербайжанның Шамкир ауданында 12 жастағы қыздың қазасына байланысты істің жаңа мәліметтері жарияланды.
Baku TV мәліметінше, тергеу барысында 16 жастағы Сама Рагимова жанжал кезінде өзінің 12 жастағы сіңлісі Афсана Новрузоваға пышақ жарақатын салғаны анықталған. Қайғылы оқиға салдарынан жасөспірім қыз көз жұмған.
Полиция қызметкерлері жүргізген жедел іздестіру шаралары нәтижесінде қылмысқа қатысы бар деген күдікпен марқұмның 16 жастағы әпкесі ұсталды.
Жергілікті тұрғындардың айтуынша, қыз жоғалғаннан кейін оны іздеу жұмыстары басталған. Кейіннен баланың үй маңынан өлі табылғаны белгілі болған. Күдікті бұл туралы полицияға өзі хабарлаған.
«Олардың арасында қандай да бір жанжал болғанын нақты білмеймін. Қыз жоғалған соң бәрі іздеуге шықты. Кейін бұл іске әпкесінің қатысы бар екені анықталды», – дейді тұрғындардың бірі.
Қазіргі уақытта аталған дерек бойынша Шамкир аудандық прокуратурасы тергеу жұмыстарын жалғастырып жатыр. Оқиғаның нақты себептері мен барлық мән-жайы анықталуда.
