Синоптиктер Қазақстанда 44 градусқа дейінгі ыстықты болжады

Қазақстанда күн ысып, кей өңірлерде ауа температурасы 44 градусқа дейін көтеріледі

Алдағы күндері Қазақстан аумағында ауа райы құбылмалы болады. «Қазгидромет» мәліметінше, атмосфералық фронттардың өтуіне байланысты еліміздің көптеген аймақтарында қысқа мерзімді жаңбыр жауып, найзағай ойнауы мүмкін.

Синоптиктер кейбір өңірлерде желдің күшеюі мен бұршақ жауу ықтималдығын да ескертті. Шығыс Қазақстан облысында кей жерлерде қатты жаңбыр күтіледі.

Ал елдің оңтүстік бөлігінде жағдай өзгеше болады. Иран аймағынан келетін құрғақ ауа массаларының әсерінен жауын-шашынсыз, ыстық ауа райы сақталады.

Мамандардың болжамынша, Батыс Қазақстан облысын қоспағанда, республиканың басым бөлігінде ауа температурасы біртіндеп жоғарылайды. Солтүстік өңірлерде күндіз ауа температурасы 30-38 градусқа дейін көтерілсе, оңтүстік аймақтарда аптап ыстық 33-44 градус аралығында болады.

Синоптиктер тұрғындарға ыстық күндері қауіпсіздік шараларын сақтап, күн сәулесінде ұзақ уақыт болмауға кеңес береді.