USD
Қазақстандағы перзентханалар мен перинаталдық орталықтар тексеріледі
Қазақстанда босандыру қызметін көрсететін барлық медициналық ұйымдарда кешенді тексеру жүргізіледі. 15 тамызға дейін еліміздегі 69 перзентхана мен перинаталдық орталықта инфекциялық бақылау талаптарының сақталуы бағаланады.
Тексеру жұмыстары Денсаулық сақтау министрі Ақмарал Әлназарованың тапсырмасымен ұйымдастырылып отыр. Оны Санитариялық-эпидемиологиялық бақылау комитеті жүргізеді.
Ведомствоның басты мақсаты – медициналық ұйымдардағы ауруханаішілік инфекциялардың алдын алу, сондай-ақ босанатын әйелдер мен жаңа туған сәбилердің қауіпсіздігін қамтамасыз ету.
Денсаулық сақтау министрлігі бұл шаралардың медициналық мекемелерді жазалау немесе айыппұл салу үшін емес, ықтимал қауіптерді ерте анықтап, оларды жоюға бағытталғанын атап өтті. Тексеру нәтижесінде медициналық көмектің сапасын арттыруға және инфекциялардың таралуына жол бермеуге бағытталған ұсыныстар әзірленеді.
Министр Ақмарал Әлназарованың айтуынша, инфекциялық бақылаудың негізгі міндеті – орын алған жағдайлардың салдарымен ғана күресу емес, олардың алдын алу. Әрбір инфекция дерегі мұқият талданып, қауіпсіздікті күшейту үшін нақты шаралар қабылдануы қажет.
Тексеру қорытындысы бойынша инфекциялық жағдайларды зерттеу тәсілдері жетілдіріліп, санитариялық талаптар мен мемлекеттік бақылау құралдары жаңартылады. Сонымен қатар әрбір жағдайға объективті баға беру тетіктері күшейтіледі.
Бұдан бөлек, өңірлік денсаулық сақтау басқармаларына перзентханаларды қажетті дезинфекциялық заттармен, зарарсыздандыру құралдарымен, жеке қорғаныс жабдықтарымен және бір реттік медициналық бұйымдармен толық қамтамасыз ету тапсырылды.
Сондай-ақ медицина қызметкерлері инфекциялық бақылау талаптары бойынша тұрақты түрде оқытудан өтетін болады.
