USD
Астанада Есіл өзенінің түсінің өзгеруіне байланысты тексеру жүргізілуде
Астана тұрғындары Есіл өзенінің «Тұлпар» көпірі маңындағы бөлігінде су бетінде пайда болған жасыл қабатқа байланысты алаңдаушылық білдірді.
Әлеуметтік желі арқылы ҚР Экология және табиғи ресурстар министрлігіне жолданған өтініште тұрғындар өзен суының жағдайын тексеруді сұраған. Олардың айтуынша, су бетінде қалың ашық жасыл түсті қабат байқалған. Бұл құбылыс балдырлардың көбеюінен немесе су айдынының ластануынан болуы мүмкін деген болжам айтылған.
Астана қаласының Қоршаған ортаны қорғау және табиғатты пайдалану басқармасы алдын ала мәлімет бойынша, өзеннің кейбір бөліктерінде маусымдық су «гүлденуі» байқалғанын хабарлады.
Мамандардың түсіндіруінше, мұндай жағдай ауа температурасының жоғары болуы, су ағысының баяулауы және қолайлы ауа райы жағдайлары кезінде фитопланктонның, соның ішінде цианобактериялардың белсенді көбеюінен туындайды. Бұл құбылыс жаз мезгілінде жиі кездеседі.
Қазіргі уақытта Астана қаласының Экология департаментімен бірлесіп, аталған аумақта тексеру жұмыстары жүргізілуде. Су сынамалары алынып, зертханалық талдау жасалады. Зерттеу нәтижелері бойынша өзен суының сапасына нақты баға беріліп, қажет болған жағдайда тиісті шаралар қабылданады.
Сонымен қатар өзен бетіндегі балдырларды тазарту және суды аэрациялау жұмыстары басталған. Бұған қоса судағы «гүлдену» деңгейін төмендету және экологиялық жағдайды жақсарту үшін хлорелла суспензиясын қолдану арқылы биологиялық тазарту әдісін пайдалану жоспарланып отыр.
