USD
Қазақстанда жаңа туған нәрестелерге жасалатын күрделі хирургиялық көмектің тиімділігі соңғы жылдары айтарлықтай артты. Денсаулық сақтау министрлігінің мәліметінше, бүгінде ауыр операциядан өткен сәбилердің 93 пайызы өмірін сақтап қалып, әрі қарай ем қабылдауды жалғастырып жатыр.
Ведомствоның дерегіне сәйкес, соңғы бес жыл ішінде туа біткен ауыр даму ақауы бар нәрестелер арасындағы өлім-жітім деңгейі 22 пайыздан 6,9 пайызға дейін төмендеген. Бұл көрсеткіш неонаталдық хирургияның дамуы, ерте диагностиканың жетілдірілуі және заманауи емдеу технологияларының енгізілуінің нәтижесі екені атап өтілді.
Қазақстанда жыл сайын шамамен 1 400 жаңа туған сәбиге күрделі операция жасалады. Қазіргі таңда мұндай жоғары мамандандырылған медициналық көмек еліміздің барлық өңіріндегі перинаталдық орталықтарда қолжетімді.
Сонымен қатар дәрігерлер жүктілік кезінде ұрықтан туа біткен даму ақауы анықталған жағдайда болашақ аналарды алдын ала мамандандырылған медициналық ұйымдарға жолдайды. Бұл босануға алдын ала дайындалып, нәресте дүниеге келген сәттен бастап қажетті ем-шараларды кешіктірмей бастауға мүмкіндік береді.
Денсаулық сақтау министрлігінің мәліметінше, қазіргі пренаталдық диагностика әдістері жүктіліктің 18–20 аптасында көптеген туа біткен ақауларды анықтауға мүмкіндік береді. Соның арқасында сәбиге өмірінің алғашқы күндерінде қажетті хирургиялық көмек дер кезінде көрсетіліп, оның өмір сүру мүмкіндігі артып келеді.
