USD
Қазақстанда жыл сайын шамамен 4 мың адамнан өкпе обыры анықталады. Денсаулық сақтау министрлігінің мәліметінше, бұл дерттен жыл сайын екі мыңға жуық адам қайтыс болады.
Мамандардың айтуынша, өкпе обырынан болатын өлім-жітімнің жоғары болуы аурудың көп жағдайда кеш кезеңде анықталуымен байланысты. Себебі сырқаттың бастапқы сатысында айқын белгілер байқалмайды, сондықтан көптеген науқас дәрігерге уақытылы қаралмайды.
Осыған байланысты елімізде 10–15 тамыз аралығында Өкпе обыры туралы ақпараттандыру апталығы өтеді. Іс-шараның негізгі мақсаты – тұрғындардың ауру туралы хабардарлығын арттырып, оны ерте анықтаудың маңызын түсіндіру.
Апталық барысында азаматтар онколог мамандардан кеңес алып, қауіп тобына кіретін адамдар төмен дозалы компьютерлік томографиядан (КТ) тегін өте алады.
Тегін тексеруден 50 жастан асқан және ұзақ уақыт темекі шеккен азаматтар, темекіден бас тартқан бұрынғы шылымқорлар, сондай-ақ зиянды өндіріс орындарында жұмыс істейтін қызметкерлер өте алады.
Ақпараттандыру апталығы 15 тамыз күні еліміздің барлық онкологиялық орталықтарында өтетін Ашық есік күнімен аяқталады. Бұл күні тұрғындар алдын ала жазылып, онколог дәрігерлердің қабылдауынан өтіп, профилактикалық тексеруден өте алады.
