Маңғыстауда облыстық аурухананың бас бухгалтері сыбайласымен бірге миллиондаған теңге жымқырды

Маңғыстауда аурухананың бас бухгалтері 32 млн теңгеден астам қаржы жымқырғаны үшін сотталды

Маңғыстау облысында облыстық аурухананың бас бухгалтері бюджет қаражатын заңсыз иемденгені үшін жеті жылға сотталды. Тергеу мәліметтері бойынша, ол танысымен алдын ала келісіп, мемлекетке 32 млн теңгеден астам шығын келтірген.

Облыстық прокуратураның хабарлауынша, күдікті бюджет қаражатын жеке кәсіпкерлер мен заңды тұлғалардың есепшоттарына аударып, кейін ақшаны қолма-қол ақшаға айналдырған. Қаржының заңсыз айналымына аурухананың бас есепшісі мен оның сыбайласы қатысқан.

Аталған дерек бойынша Қазақстан Республикасы Қылмыстық кодексінің 189-бабы 4-бөлігінің 2-тармағымен, яғни аса ірі мөлшерде сеніп тапсырылған бөтен мүлікті иемдену немесе талан-таражға салу фактісі бойынша қылмыстық іс қозғалған.

Сот процесінде айыпталушылардың кінәсі дәлелденді. Нәтижесінде аурухананың бас бухгалтеріне жеті жыл мерзімге бас бостандығынан айыру жазасы тағайындалды. Сонымен қатар, оған бес жылға дейін бухгалтерлік қызметпен айналысуға тыйым салынды.

Ал оның сыбайласына жеті жыл мерзімге бас бостандығын шектеу жазасы берілді.

Прокуратураның мәліметінше, сот үкімі заңды күшіне енген.