Қазақстанда баспаналы болатындар саны үш есе артады – Отбасы банкі

Қазақстанда баспаналы болғандар саны артады: Отбасы банкі тұрғын үй бөлу қарқынын үш есеге жеткізді

Қазақстанда тұрғын үй кезегінде тұрған азаматтарды баспанамен қамту қарқыны айтарлықтай өсті. Отбасы банкінің мәліметінше, Ұлттық даму институты мәртебесінде жұмыс істеген алғашқы жылдың өзінде 23,5 мың отбасы жаңа баспананың кілтін алған.

Бұл туралы Үкімет отырысында «Отбасы банкі» АҚ басқарма төрағасы Ләззат Ибрагимова мәлімдеді.

Банк басшысының айтуынша, тұрғын үйді бөлу үдерісінің цифрландырылуы оның жылдамдығын үш есеге арттыруға мүмкіндік берген. Бұған дейін әкімдіктер бір жылда шамамен 7 мың пәтерді үлестіріп, бұл жұмысқа 700-ге жуық маман жұмылдырылған.

Қазір аталған міндеттің едәуір бөлігін Отбасы банкіндегі небәрі 20 маман жүзеге асырып отыр.

Жыл соңына дейін кезекте тұрған азаматтарға тағы 8 812 кредиттік пәтер беру жоспарланған. Жоспарланған тұрғын үйдің жалпы құны 130 млрд теңгені құрайды.

Жалпы, соңғы бір жарым жыл ішінде Отбасы банкінің қолдауымен тұрғын үй кезегінде тұрған 40 мың отбасы баспаналы болған.

Банк өкілдерінің айтуынша, цифрлық шешімдерді енгізу алдағы уақытта тұрғын үйді бөлу процесін одан әрі жеделдетуге мүмкіндік береді.