USD
Қостанайда адамды ақша үшін ұрып-соғуды «кәсіпке» айналдырған ер адам сотталды
Қостанайда адамдарға күш көрсетіп, одан ақша табуды жолға қойған ер адам төрт жылға бас бостандығынан айырылды. Ол Telegram арқылы тапсырыс қабылдап, клиенттердің сұрауы бойынша адамдарды қорқытып немесе ұрып-соғу қызметін ұсынған.
Сот материалдарына сәйкес, сотталған азамат жекпе-жек өнерінен алған тәжірибесін заңсыз табыс көзіне айналдырған. Ол мессенджерде адамдарға күш көрсету бойынша қызмет ұсынатыны туралы хабарландыру орналастырған. Тапсырыс берушілерден бір адамды қорқыту немесе ұрып-соғу үшін 100-200 доллар көлемінде ақы алған.
Наурыз айының соңында оған Telegram арқылы кезекті тапсырыс түскен. Тапсырыс беруші Қостанай тұрғыны К. есімді азаматты тауып, оны «жазалауды» сұраған. Ақшаға келіскен ер адам жәбірленушіні анықтап, бірнеше сыбайласымен бірге оған шабуыл жасаған.
Шабуыл кезінде ер адамды қолдарымен және аяқтарымен басынан әрі денесінен бірнеше рет ұрған.
Осы факті бойынша оған Қазақстан Республикасы Қылмыстық кодексінің 110-бабы — пайдакүнемдік ниетпен және жалдау арқылы азаптау бойынша айып тағылды.
Сот отырысында айыпталушы өз кінәсін толық мойындаған. Ол бас бостандығынан айыру жазасын тағайындамауды сұрап, жеңілірек жаза қолдануды өтінген. Жәбірленуші де сотта сотталушыға материалдық немесе өзге де талап-арызы жоқ екенін мәлімдеген.
Дегенмен сот істің барлық мән-жайын және жасалған қылмыстың ауырлығын ескере отырып, бас бостандығынан айыру жазасын тағайындады.
Нәтижесінде ер адам орташа қауіпсіздік деңгейіндегі мекемеде төрт жыл жазасын өтейтін болды.
Сот үкімі әзірге заңды күшіне енген жоқ. Тараптардың апелляциялық тәртіппен шағым беруге құқығы бар.
