USD
Қазақстаннан 645 млн теңгеден астам декларацияланбаған валюта алып шығу әрекеті анықталды
Қазақстан шекарасында соңғы он күн ішінде елден декларациясыз қолма-қол ақша алып шығуға қатысты 70 дерек тіркелді. ҰҚК Шекара қызметінің мәліметінше, анықталған валютаның жалпы көлемі 645 млн теңгеден асады.
Мұндай заң бұзушылықтардың алдын алу мақсатында шекара қызметі өткізу бекеттеріндегі бақылауды тұрақты түрде жүргізіп келеді. Биыл 1-10 тамыз аралығында жүргізілген тексерулер кезінде декларацияланбаған ірі көлемдегі ақшаға қатысты ондаған жағдай анықталған.
Солардың бірі Жамбыл облысындағы «Қордай» автомобиль өткізу пунктінде тіркелді. Шекаралық бақылау кезінде шетел азаматының киімінің астына жасырылған 70 мың АҚШ доллары табылған. Бұл қаражаттың теңгедегі баламасы шамамен 32,55 млн теңгені құрайды.
Аталған фактілер бойынша жиналған материалдар әрі қарай тиісті процессуалдық шешім қабылдау үшін құзыретті органдарға жолданды.
Шекара қызметі қолма-қол ақшаны шетелге алып шығуға қатысты талаптарды сақтаудың маңызын еске салды. Қолданыстағы тәртіпке сәйкес, Қазақстан аумағынан 10 мың АҚШ долларынан асатын қолма-қол ақша белгіленген талаптар сақталмайынша алып шығуға жатпайды.
ҰҚК азаматтарды шекарадан өту кезінде валютаны декларациялау тәртібін сақтауға және қолма-қол қаражатты тасымалдау бойынша заң талаптарын алдын ала ескеруге шақырды.
