USD
Қазақстанда бастауыш сынып оқушыларын бағалау жүйесіне өзгеріс енгізу ұсынылды. Оқу-ағарту министрлігі әзірлеген бұйрық жобасы «Ашық НҚА» порталында жарияланып, 21 тамызға дейін қоғамдық талқылауға ұсынылды.
Жобаға сәйкес, 2–4-сыныптарда бөлім бойынша жиынтық бағалау (БЖБ) мен тоқсандық жиынтық бағалау (ТЖБ) өткізілмеуі мүмкін. Оның орнына оқушылардың білім деңгейі қалыптастырушы бағалау, тақырыптық және қорытынды бақылау жұмыстары арқылы анықталады. Бұл жұмыстардың нәтижелері тоқсандық қорытынды бағаны шығарғанда есепке алынады.
Ал 5–11 (12)-сынып оқушылары үшін қолданыстағы бағалау тәртібі өзгеріссіз қалады. Олар бұрынғыдай БЖБ мен ТЖБ тапсырады. Бірінші сынып оқушыларына да бұрынғыдай баға қойылмайды.
Министрліктің мәліметінше, жаңа ұсыныс ата-аналар мен педагогтердің пікірлері негізінде әзірленген. Сондай-ақ Ыбырай Алтынсарин атындағы Ұлттық білім академиясымен бірлесіп жүргізілген сараптама нәтижесінде БЖБ мен ТЖБ бастауыш сынып оқушыларының білім деңгейін жан-жақты көрсете бермейтіні және оларға қосымша оқу әрі психологиялық жүктеме түсіретіні анықталған.
Ведомствоның пікірінше, ұсынылып отырған өзгерістер бастауыш сыныптағы бағалау жүйесін жетілдіріп, оқушылардың оқу жетістіктерін неғұрлым тиімді бағалауға мүмкіндік береді.
